Reflexión sobre o Colexio Santa María la Blanca (Madrid)

 

No colexio concertado Santa María la Blanca, a innovación maniféstase a través da ideación dun sistema pedagóxico propio, coñecido como EBI (Educación Básica Interactiva). Por medio da combinación das ferramentas e recursos TIC ao seu alcance e o deseño dunha guía de aprendizaxe configurada atendendo ás características e necesidades do alumnado, este centro madrileño consegue ofrecer unha educación personalizada e individualizada para os seus alumnos/as, atendendo ás habilidades, intereses e motivacións de cada un/unha deles/as coa fin de que poidan acadar o seu máximo potencial.

En cada materia, os rapaces e rapazas céntranse en cumprir cos obxectivos marcados especificamente para eles/as polo titor e mailo/a profesor/a de cada unha das disciplinas que estudan, polo que as clases non son exactamente iguais para todos/as.

Unha vez por semana, os/as estudantes reúnense cos docentes de cada materia para que estes poidan realizar un seguimento do seu progreso e para que os alumnos aproveiten para preguntar as dúbidas que teñan ou facer as suxestións que consideren oportunas.

No referente á incorporación das novas tecnoloxías no proceso de ensino-aprendizaxe, cabería sinalar que cada estudante conta co seu propio ordenador portátil dende quinto de primaria. As  ferramentas TIC funcionan, xa que logo, como recursos útiles para a aprendizaxe autónoma dos alumnos e para o traballo colaborativo entre eles.

En canto ao sistema de avaliación, os discentes contan con total liberdade para decidir como (mediante exposicións, probas escritas ou outro tipo de actividade) e cando desexan ser avaliados da guía de aprendizaxe que foi deseñada a medida para eles.

Tendo en conta todo o exposto con anterioridade considero que o sistema EBI ideado polo colexio Santa María la Blanca constitúe tamén un bo exemplo de educación innovadora. Así e todo, non vexo factible a súa aplicación en tódolos centros educativos, xa que non tódalas escolas contan cos medios e recursos necesarios para dotar a cada alumno dun ordenador portátil. Ademais, para que este tipo de ensino personalizado funcione axeitadamente e teña éxito, cómpre que exista unha moi boa comunicación e coordinación entre tódolos membros da comunidade educativa, feito que non sempre é posible.